Poslovne vesti - Makedonija

Македонија ќе набави современи возови

Република Македонија по подолг период ќе го модернизира патничкиот железнички сообраќај, за што од кинеската корпорација CSR ќе набави четири дизел моторни гарнитури и две електромоторни гарнитури.

Договорот, кој во вторникот во Скопје го потпишаа македонските власти и претставниците на кинеската корпорација, предвидува гарнитурите да пристигнат следното лето.

Гарнитурите се со капацитет од 1.200 патници, целосно ќе бидат климатизирани, опремени со вакуум тоалети, енергетски ефикасни и ќе ги задоволуваат сите безбедносни стандарди, како и стандардите за превоз на лица со ограничена мобилност.

Вицепремиерот и министер за финансии Зоран Ставрески истакна дека владата планира голем инвестициски циклус во Македонската железница со изградбата на пругата кон Бугарија, реконструкцијата на железницата во Скопје како и набавката на нови вагони.

„Во следните четири години планирани се инвестиции од 250 милиони евра за трансформација и реорганизација на македонскиот железнички сообраќај. За набавка на нови патнички вагони предвидени се 25 милиони евра, за товарни вагони 15 милиони евра и 10 милиони евра се за рехабилитација на веќе постоечки возови“, рече Ставрески

Министерот за транспорт и врски Миле Јанакиески информираше дека со набавката на новите гарнитури, за што средствата се обезбедени преку  ЕБОР, се подигнува квалитетот на услугата која се нуди во патничкиот железнички сообраќај и се креираме една нова, поинаква слика за железницата во Македонија.

„Ова е долго очекувана набавка за МЖ Транспорт, имајќи го во предвид фактот дека последниот воз е набавен пред 35 години, верувам дека на овој начин ќе допринесеме максимално подобрување на ефикасноста и ефективноста на возниот парк на претпријатието“, рече Јанакиески.

Претставниците на кинеската компанија ветија дека навреме и во целост ќе го исполнат договорот.

„Досега нашата компанија има снабдено производи и сервиси за над 80 земји во светот. Во Македонија потпишуваме прв договор и мислам дека е многу важна иницијативата на македонската Влада да го подобри јавниот транспорт, рече претседателот на CSR корпорацијата Шу Цонгшијанг.

Во трка за да ја снабди Македонија со нови возови беше и швајцарската компанија Штадлер Буснанг АГ, но нејзината понуда беше повисока за околу половина милион евра.